Page:MS Bibl. 2465 103v.jpg

ledig machen / denn brich Im übersich / Ittem Annbrich / gemecht stos / Bein bruch oder knüstos / Zum Erstenn will ich das harnasch fechten Exempels weis durch gehenn / darnach die forteill der vorgemelten wehren sezenn Im Anthretten nim dein schwertt Inn die oberhut mit dem beidt nebenn deim haupt / vnnd greiff mit der Lincken handt dein kling In der mit / dz die spitz dem man Inn sein gesicht steh / thrit Also zu Im / das dein Lincker fus Alzeit vorstehe sej nit zu goch / vnnd schaw ob du Im sein vorgesezten fus megest Erlanngen / so thu als weltest Im zum gesicht stehenn / las Inn des die recht handt vom hefft / vnndt kum domit der Lincken handt zu hielff vnnd schlag Inn mit dem knopff / zum kopff / oder zu seim Lincken arm / versezt Er dür denn schlag zwischen sein beidt hendt / so las vm den kopf Faren / vnnd schlag Im vonn deiner Rechtenn / zu seim knibien oder Enckel Ittem gehe Inn der ober hutt zu Im wie vor / vnnd hab Acht ob Er dür Annsezenn oder stehenn woll / so sez im vor deiner Lincken hanndt ab / schlechtt Er dür dann von obenn / so versezt Im denn schlag / zwischen dein beidt handt stich Inndes ausen über seinn arm / vnd sez Im Ann drißell / als baltt du befindest