Page:MS B.26 016v.png

[E]in schiessen mit dem spiess Nym dein swert In dein lincke handt bey der klingen vnd den spiess In die rechte handt vnd ker den schafft fur sich vnd leg In auf das swert gehiltz sam dw gar Torlich gen Im laufst vnd wen er dir In dein Rechten rennen sey / so stoss mit dem swert vnd der handt den schaft reschlich vbersich vnd scheus In an vnd In dem schutz so lauf mit dem swert In In vnd stichen so kan er aber / zu seim swert nicht kemen hat ers vor nicht heraussen vnd vnterlauff Im den spies auch das er dich nit ge / schissen mag vnd stich In gar hart bis er zu dem swert kimbt

[E]in guter schuss oder schlag stich aus dem spiess / vnd get gar schlechtlich vnd verholen zw das dw gegen ainem [?] so nym den spiss In paid gewappent verwant hendt / vnd ker dein Rechte seitten pain vnd arm fur trit den[?] ainer gegen dir mit einem swert oder spiess vnd will dir dein spies ausweisen / so magstw In woll lassen lauff[?] biss zw halben spiess / so trit dan gar Reschlich mit dein rechten pain zu ruck vnd In dem trit so las dein spies vber dein kopff vmb gen yn deiner rechten handt / so wirt dein spies kurtz gennug vor dir vnd magst also dein spis woll In In schlahen mit deiner eissen oder schiessen was dw wilt / das get dir gar eben vnd geradt darauss