Page:Cod.10825 182v.png

Ein vnderer vnd ein oberer Schnit.

Item wann Ir zu°samen gond, so schick dich also in dises stu°ck, Stand mit deinem rechten fu°ß vor, vnnd halt dein Sichel in deiner rechten hand gegen dem Mann, dein lingke vnder deinem rechten arm, In dem trit mit deinem lingken schenckel hinein, vnd schneid Im von vnden nach seinem rechten arm, Steest du° dann au°ch mit deinem rechten fu°ß gegen Im, vnd heltst dein sichel in deiner rechten hand in dem obern schnit, dein lingke vnder deinem rechten arm, so nimb Im das ab mit deiner Sichel au°ff dein lingke seitten, In dem greiff Im mit deiner linggen hand in sein rechte, vnd schneid Im nach seinem hals seiner lingken seitten, Schneidt er dir also oben zu°, So fall Im mit deiner lingken hand in sein rechte, nimb Im damit seinen schnit hinwegk au°ff dein lingge seitten, In dem schneid Im mit deiner Sichel nach seinem linggen arm, vnnd trit damit zu°ru°gk, Ist er also zu°ru°gk treten, so raiß Im zwifach nach, vnd schneid Im nach seinem hau°bt,