Page:MS Chart.A.558 010r.jpg

Item etliche figür thut man mit xxx abe Etliche mit ix Etliche mit vij / Darnach als deññ dÿ figur sind Als ich hernach ytzlich figür setzen wil / so ich die figur setz vnd das A b c

It~ wisßt aüch das alle figur genomen Vnd aüßgeczogen sind auß Astronomÿe

Item man sol aüch die namen In latein mit lateynischen puchstabñ schreiben vnd nicht mit anderñ puchstaben

It~ man sol sich fleißen das man dÿ czale Recht setze vnd ab thue Wenn ein czale macht ein große Irrung

Item nü will ich dir dÿ figur setzen / Vnd von Ersten die da heißet die figur Pÿtogoras des Meisters In der figur mag mag [sic!] man wol vinden alles das man fraget Ob es glücklich ader vnglucklich get In dem ersten so setze den namen ader waz du wisßen wilt mit kreÿden aüff den Tisch In lateÿn mit lateÿnischen puchstaben / Vnd setze zü Itlichem puchstabñ dÿ czale als sie daññ do geschriben stet in dem A b c In dem Czwickel vnd nym~e allweg davon xxx so offt du macht vnd das vberige halte vnd setze darnach den widerpart / Das ist der ander name auch mit disem A b c Vnd suche deññ an welchem ende darümbe Ir es thut das merck gar wol ~

It~ am ersten sült Ir wisßen das dise figur geteÿlt ist In vj teÿl als ich euch doch beczeichen wil

It~ das ober teÿle in der figur in der mÿtte / das bedewt das Recht glücke syg das leben vnd alles gut zü der Rechtñ hant

Item das darnach bedewt auch glücke vnd darInn ein cleyne harrüng / vnd ist doch gut