Page:MS KK5126 128v.jpg

Tout [?] zw dem erstn sol im sein fursprech wandel dingenn vnd alle recht die ein chempfer von rechcz wegenn habenn sol es sey warner lüsner grieswartl vnd was ein chempfer habenn sol

Item wenn er sein warn benennt so sol er fragenn wie er warnenn sol das er recht thu vnnd nicht vnrecht

Item er sol auch fragenn ob er vnd der warner wol zw dem chempfer gen müge dy weyl er an seiner rue siczt vnnd mit in ir notturfft redenn

Item er sol aber fragenn ob er ein sig gewinne oder verlornn ob er vnnd sein warner wol zw im gen mügen vnd ir noturfft wol mit ym redenn also so er wider An sein rue chumbt ym chrais

Item wenn er denn grieswertel oder lusner genannt so sol er in fragenn wie er Lüsen Sol das er recht thue vnnd nicht vnrecht

Item er sol auch fragenn wie er mit der stängenn thun sol das er recht thue

Item er sol auch fragenn ob ir ainer der stangenn begert wie er die vntterstossenn sol das er recht thue vnnd nicht vnrecht

Item er sol auch fragenn was die grieswertel oder lusner hornn oder sehenn wie sy das furbringen das sy recht thunn vnnd nicht vnrecht

Item er sol auch fragenn Was die grieswärtl ein müetiglich sagenn als die das gesehenn oder gehort habenn ob es icht billichenn do bey beleyb

Item er sol auch fragenn ob die griswertel mit ein ander nicht stössig sein vnd nit vber ains mochten wern zw sagenn was dann dy vrtailer gesehenn oder gehort hiettenn ob es nit billichenn do peleybe das weybe leyb vnd das die auch dar vmb sagenn süllenn

Er sol auch fragenn es sey grieswertl oder vrtailer wie sy darvmben sagenn sullenn das sy recht thunn das man das ausfunndig mach

Es sol auch denn chempfer fragen wellicher ein anchlager sey ob er icht billichen die wal vnnd die vorfart hab zu dem chrais zw siczenn mit seinem stull wo er wil

Er so auch denn chempfer fragenn wie manigen cholben er habenn sul vnd was er habenn sol zw dem champf

Er sol auch fragenn ob er ein cholbenn verwürff der aus dem chrais chemb was recht werr

Er sol auch fragenn ob er ein cholbenn verwürff der im chrais belib ob im der nicht billichenn zw staten wider chem ob er sein begert

Item er sol fragenn ob sein grieswärtl ycht billichenn ein cholbenn bey im habenn sull oder eins begert das er im denn mocht zw pringenn das das [!] er Recht dar ann tat vnnd nicht vnnrecht

Er sol fragn was aus dem chrais chem es wer an Hennden am leyb an ann [!] fuessenn am schilt ann cholbenn Was darvmb Recht sey

Er sol fragenn wie manige stanngenn er begerenn sul vnd wie offt er den // _{/// Sig domit verlorn hab}