Page:2º Cod.MS.Philos.62 42v.jpg

Zur .40. figura explicatio vom Bruch des Schlossringens.

In dem nachfolgenden lehret vnd demonstriret der Autor auf die vorigen dreÿ arte des ringens, das wiedersteil oder kegenlern, das ist wen gleich einer die vorigen dreÿ arte recht vnd gewiste kontte, kan man ihm doch alles mit der kegenler oder mit dem wiedersteile wehren, vnd vorhindern, wen man solcher kunst nur gelobet ist, vnd die selbige offt vnd ritterlich gebraucht hat, damit man in dieser kegenlern oder in den nachfolgenden figuren so lange mit dem proces nicht warten, bis der kegendeill das gewichtte vnd die andern vorteil, welcher in den vorigen figuren gedacht ist, gar ein genommen hat, sondern man mus ihme solches zue rechter vnd begunener zeit verhind‘n vnd ihm fur komen, doch mus solches auch alles nach dem gewicht, nach der declination, nach dem vertreten, vnd nach den andern schwechen des leibs geubt vnd gebraucht werden, wie solches beÿ den vorigen ahrten vnd figuren gnugsam erkleret, vnd ist diese figura auch zue vor in der .15 abgemahlet, allein das die alhie muglieges dort aber vorwerts gesetzet ist, vnd ist gleich die halbe huffe die kegenlehrn des schloßringens kan auch lincks vnd rechts gebraucht werden, wie die andern figuren, vnd es kan das schloßringen auch wolans andern arten mehr geweret werden, wie beÿ den nachfolgenden figuren gnugsam wird angezeiget vnd demonstriret werden.