Page:MS Bibl. 2465 064v.jpg

von vnden auff dein dolchen klingen, vnd in der versatzung spring Im woll vnnder sein streich, vnnd ergreit im sein rechte hanndt, mit deiner Lincken verkherten hanndt nochett bej seim gelenck, oder begreiff Im sein wehr, bey seim gefes, Ruck Im also, sein wehr auff dein lincke seitten, von vnnden auff übersich vmb, Arbeite Im mit deim dolchen zu der blös oder stich im zu seim rechten arm, so mus er das wechr laßen

Sticht dür aber einer von vnden so versez von oben nider vnd spring zu im, vnd ergreif Im behenndt sein arm darin Er die wechr hatt, oder ergreif im sein wehr bej dem kreiz, vnnd arbeite Im zum gesicht oder gurgel, noch gelegenheitt ⁋

So du im aber nit drauwest ein zu kumen wie iezt gemelt, vnd du dich doh must wehren oder schadenn leiden, so fast dein dolchen zum wurff vnd wirf im den in dz gsicht oder wo du in drawest zu threfen, vnd folge behendt in eim sprung dem wurf nach vnd schaw dz du in ereilest bej seiner kell vnnd rechten hanndt ⁋

Merck wann du im also dein dolchenn nach seim gesicht geworffen hast, vnnd du Im also dem wurff nach einlauffest, so leg dein beide henndt kreuctz weis die recht über die linck, vnd fang Im sein gefes zwischen dein beid hend vnd fas in hant wend auff dein rechte seitten vnd ruck zu dür stos in mit deiner lincken auf sein elenbogen ⁋

Ittem ist er aber starck vnd du im die wehr nit gleich nemen kanst, so greif zu den Ringen, vnd gebrauch der forteill so du einen ereilest greif im nach der gurgel oder mit dem daumen in die augen oder far im vnder dj naßen oder stos in mit dem daumen vnder dz khin ⁋