Page:MS KK5126 123v.jpg

Bey dem tenncken elpogenn so wenck dich nyder vnd far mit dem tenncken elpogenn In die wüest vnnd spring mit dennckenn fueß hinder seinenn rechten fueß mit deiner hannd In der chnyepug vnd zeuch do mit zw dir vnd mit der tenncken stöß yn obenn vonn dir So velt er

wenn dir ainer begreyft dein tencke hannd mit seiner dennckenn vnnd nymbt dir mit der gerechten das geswicht [!] vnnd stost er dir denn tencken elpogenn hoch auf so wend dich mit dem haubt dar durch vnd far im mit dem rechtenn arm In sein tenncks chnye wüest vnnd spring mit dem rechtenn hinder seinenn rechten vnnd würff in dar vber

wenn dich ainer geuast hat bey dem arm vnd dw in wider vnd helt er dich lose so slach im den tenckenn arm aus mit deiner rechtenn hanndt von obenn nyder vnd begreyff im do mit sein tenncks pain In der chnyepug vnd zeuch zw dir vnd mit der tenncken stos in vorn an die prust an seiner tencken seytenn so mues er vallenn

also pruch das

wenn dir ainer greyfft vorn an die prust mit seiner tennckenn hannd so begreyff Im sein tenncke hannd mit seiner dencken vnd mit deiner rechtenn hand nym im das gewicht bey dem tencken elpogenn

oder stos Im mit deiner rechtenn hannd denn tennckenn elpogen vbersich vnnd wennt in also vonn dier

wenn dw dich mit einem vast hast bey denn armen Helt er dich denn los so schlach sein rechte hand aus deiner tenncke von obenn nyder vnd far im da mit vnden durch sein rechtenn arm vnd begreyff in hindenn vnd halt In west vnd zeuch vnd mit der rechtenn hannd begreyff In auswendig in seiner rechten chnyepug so wursst [!] dw in auf die tennck seyttenn das get zw paidenn seytn zue

wenn dw dich mit einem geuast hast das dw die ainen hannd vnder seinen arm hast vnd die andern oben vnd er dich auch also Vn jenner ist starch vnd druckt dich vast zw im so secz im denn elpogenn an die chel vnnd druck In da mit vast das dw mit der hannd die dw obenn hast so mues er dich /_{/// lassenn /}

ob dich ainer hiet geuast vnnder deinen arm vnd druckt dich vast zw im mit sterch vnnd thuet dir we so prich dich also von Im greyff Im Im [!] mit paidenn daumen in sein chel oder vnder sein chinpackenn oder in sein chel so mues er dich lassenn

wenn dw dich mit einem hast geuast das dw ain hannd vnnden hast die andern obenn vnnd er dich auch also so far im mit dem arm denn dw oben hast vnder denn chinpackenn an denn hals vnd stos In vast vonn dir vnd mit der hand die dw vndenn hast begreyff im das pain zu der chnyepug vnd zeuch do mit zw dir so wiert er geworffenn

ob dir ainer das prechenn wern wolt vnd wolt dir das gewicht nemen bey dem ellpogenn so senck den selben elpogenn vnttersich vnd druck im denn in die seyten vnd mit der anndern hannd begreyff im ein pain In der chnye pug vnd wurff in dar vber

Wenn dw dich mit ainem hast geuast das dw ain hannd obenn hast vnd die anndern vnden vnd er dich auch also helt er dich dann lose vnd Druckt nit vast zw im so wechsel die hannt die dw vnnden hast im auf die andern seytenn auswenig in sein chnyepug vnd heb da mit auf vnnd mit der dew oben vast far im obenn far vmb denn hals vnd stos in da mit oben von dir so velt er

Wenn dw dich mit einem geuast hast als vor geschribenn stet so var mit dem arm denn dw vnnden hast von vnndenn auf auswendig oben vber sein arm denn er obenn hat vnd chüm mit der anndern hannd der hannd zw hilf vnd druck vast nyder vnd wennd dich von im

Vnd ob dir ainer mit