Page:Cod.icon. 393 I 120r.jpg

Ratio qua collo adversarii acinac^em adponere poteris, nec non urgere.

Ad praedictum habitum ea lege te compones: dextrum pedem anteponas acinacem dextra levatum super capite contineas. Sin vero is pari modo et ratione utitur tu vicissim eodem pacto utere, verum subito sinistro pede progressus versus hostem directe ictu supernum usurpando caput ipsius ferito. Et si is pari modo fuerit usus, superno ictu tum ipsius ictui obviato, curabisque ut eundem excipias aciem praevertendo longam. Inde ingressus ad hostem sinistro hoc modo ut idem pes iuxta hostis pedem itidem sinistrum inferne consistat. Post mutato acinace, ita ut mucro tui acinacis in latus adversarii dextrum vergat, verum celeriter sinistra manu medi acinace correpto collum adversarii ea ratione urgeas, acie autem longa id fiat antrorsum, inde totis viribus hostem retrorsum agas acinace urgendo, inferne vero si in poplitem ipsius pedem tuum inieceris, prosternere hostem poteris attrahendo. Sed si tu pari ratione ab hoste interclusus superne et inferne fueris, tum sinistram tuam manum dextrae hostis subiicie, et sursum agas firmiter eam. Inde si quam celerrime visum ipsius pungere fueris molitus, te dimittere cogetur, nec non avertere tuam punctionem atque ea ratione te securum tutumque reddes.