Page:MS 26-232 122r.png

Das Ist wiltu einem zw der linken seytten Reitenn So soltu starck sein mit der wer es sey glefenn oder schwert vnd wart das dw dem man den ort mugst angesetzen da soltu In mit zwingenn gleich als dw zw der Rechten seyttenn hast gethon damit zwinnt dw In mit den stuckenn die man zw der linkenn seyttenn treyben sol wan es sein ettlich Stuck die man zw der linken seytenn treibenn soll die zw der Rechten seyten nit gen

Item darumb Spricht die xx figur schut gegen allenn treffenn die ymer werdenn das ist dw solt sterckenn in allen anpindenn

Item wen dw dem man Reytest zw seiner linkenn seytten mit einem oberhaw so Stich Im nach der Bloeß mit gestracktenn armenn vnnd hawt er dir mit dir gleich ein vnd Ist Starck mit dem Schwertt vnd will dich vbersterckenn vnd sucht die bloeß auch mit dem ortt So vas mit deinem linken arm von Inwendig aussen uber

sein Schwertt vnd truck das vast vber dein linke seytten vnd reitt neben hinweg So nimstu Im das schwert vnd das leret die 15 figur die spricht die were vach In der mit In dem wider reytten

Item ob dw Nahet an In kümst So var mit deiner linken hand auff Sein R hand vnd In nit da mit zw der wer kumen las vnd treib mit der L hand die Stuck vnd ringenn die vor vnd nach geschrybenn Stenn

Oder vmb ker
gerüt zw Jagenn der wer
mit allenn kunstenn
Der do Jagt der schickt nach gunstenn'

Wenn dw mit eynem zw der linkenn seyttenn zw Reitzt vnd dich dein Roß vber trug das dw In den vorgeschribenn stuckenn nicht kumen mochtest so las dein Roß nit fer von Im lawffenn wurff dein Roß auff dein linke seytten Also das dw mit deiner linkenn seytenn an sein Rechte kumest vnd treib die Stuck vnd die ringenn vnd alle kunst die zw der Rechten seyten gehorenn