Page:Discours de la théorie de la pratique et de l’excellence des armes (André des Bordes) 1610.pdf/21

merite, soit que provoquez par des parolles, ou agitez de colere de venir aux mains, les representent toutes quatre. La premiere, alors qu’ayant tiré l’espee hors du foureau entierement, ilz levent le bras a mesme temps pour frapper. La seconde, alors que tenant ferme ilz abaissent un peu la main, avec le bras, a l’égal de l’espee. La troisieme, a l’heure mesme qu’ilz se mettent en posture avec l’espee pres du genouil du dehors. La quatriéme, en rapportant la main de lespee au dedans du genouil. Ce sont icy les principalles gardes, & desquelles toutes les autres desrivent comme de leurs elementz, & desquelles elles sont fortifiees comme de leurs fondementz, que nous mettrons icy par ordre, mais au paravant je parleray de la façon de frapper afin de ne ressembler les Alchemistes sans experience, qui ne tirent de leur science qu’une vanite, & qui n’en font paroistre qu’une fourbe, & une obscurité.