Page:MS KK5126 110v.jpg

Das anseczenn yst ein ernnst stucke wann es get auf das aller nachst zw denn vier plossenn vnd gehort zw treybenn wo dw pald ennd wild gebenn mit dem swert vnd das anseczen treib also wenn dw mit dem fechtenn zw im chumbst so leg dich mit dem Swert in die huet des ochsens oder des pfluegs wil er dann obenn ein hawenn oder vnden zue stechenn von seiner rechtenn seytenn so merck die weyl er sein swert auf hebt vnd wil slachenn oder vnden zw im zeucht vnd wil stechen So scheus dw vor in den langen ort ein zw der pless seiner dennckenn seytenn ee wann er denn haw oder stich verpring vnd wart ob dw im mugst an geseczenn des gleichenn thue auch wann er dir mit vnderhawen zw hawt vnd das get zw paidenn seytenn

wiert er dann deins anseczen gewar vnnd verseczt so pleib mit deinem swert am dem seinen vnd zeuch da vonn nit ab vnd arbait mit dem Swert gar Behendigklichen zw der nachstenn plöss so mag er zw chainem stuck chumen zeucht er sich dann ab vom swert so treib die nachraisenn die dier am nachstenn her nach verklärtt werdenn

Das ist der text vnd die glos dar auf wie dw solt nachraissenn

Nach raisenn lere
zwifach oder sneyd im die were
zwai ausere mynne
der arbait dar auf Begine
vnd prüff die geferte
ob sy sein waich oder herte

glosa der nach raisen ist vil vnd manigerlay vnd gehorn zw treybenn mit grosser fursichtikait gegen den fechtern die daraus freyen vnd langen heUen fechtenn vnd sunst von rechter chunst des swercz nit haldenn

Das erst stuck aus dem nachraisen treib also

wenn dw mit zuefechten zw im chumbst so secz den denncken fues vor vnd Ste in der huet vom tag vnd siech gar eben was er gegn dir vicht hawt er dier oben lanck ein von seiner rechten achsel so wart das er dich mit dem haw nit erlanng vnd merck die weyl sein swert mit dem haw vndersich get gegen der erden so spring zw dem rechtenn fuess vnd haw im obenn ein zw der plöss seiner rechten seytenn E (sic) wan er mit dem swert wider auf chumbt so ist er erschlagenn

Wenn er sich vor hawt vnd dw im nach hawst fert er denn pald auf mit dem Swert vnd versetzt so pleib mit dem langen sneyd starck auf dem swertt hebt er denn mit dem swert dein swert vber sich so spring mit dem tencken<n> fuess hinder seinen rechten vnd slach in mit der twier oder sunst zw dem chopf seiner rechten seytenn vnd arbeit pald wider vmb zw seiner dencken mit dem duplier<e>n oder mit andern stuckenn dar nach vnd dw enpfindest ob er hert oder waich an dem swert ist

wenn er sich vor hawt vnd dw im nach hawst pindest denn auf sein swert gegen deiner dencken seytenn slecht er denn aus der versatzunng pald vmb mit der twier dier zw der rechtenn seytenn chum im indes mit der twier vnder seinem swert gegenn seiner tencker seytenn an seinen hals oder spring od<er> mit dem tencken auf sein rechte seytenn vnd haw seinem haw nach auch zw seiner rechtenn seytenn oder treyb den schnidt ob seinem arm<e> zw dem chnopf (sic)

Ein guet nachraisenn

wenn dw gegen im fichst aus dem vnterhaw oder aus den streichen oder ligst gegen im in der huet alber felt er dir denn mit dem swert auf das dein E (sic) wenn dw dw (sic) do mit aufchumbst so pleyb also vnden am swert vnd heb vber sich wil er dir dann aufwinden so lass in vom swert nicht ab chumen vnd folg