Page:MS Chart.A.558 007v.jpg

Wer es sant Jorgen bruder / Vnd welet er aber mit mutwilln der aüch sant Jorgen bruder wer / so sal er aüch alle sein sache an vahen an dem tage dÿ vnnser frawen bruder zügehören / als am Eritag pfincztag samßtag vnd sal in gleicher maße thün als am tag mitschreiben vnd mit antwürten

Item desgleichen ist auch mit vnnser° frawen bruderñ die sollen für sich nemen dÿ tag die sant Jorgen brüder zügehören

Item es ist vast züüersicherñ das sich einer hütet das er sein° clage ader antwürt nicht verwandel waññ es mag wol ein clager ein antworter werdden / So wer deññ dÿ Rechnü~g gantz verkert da vor sal sich einer hüten / dann es werdden gar viel lewt damit verkürczt

Item wisßt auch das gewönlich ein anclager der ein antwortter der da mutwillet ist gut das er sich da nicht vergeht vnd solang sein clag ader antwort verhalt biß Im der tag kumpt der Im zu gehört so thu er daññ waz er willen habe

Item vnd mer ist zu wisßen weññ eyner fÿchtt auff ein tag der nicht sein ist der müß ye wünt werdden Ist das dem geschiht wenn einer fychtet mit seinem bruder aüff einen tag der nicht sein ist so hat der anclager sygk vnd sust nicht

Item wölt Ir daññ wisßen weññ zwen vechten / welchr° wünt wirt vnd an welcher stat des leÿbs so thut Im also / Sol der den sÿg hat vechten mit einem an seine~ tag als mit seinem bruder Süst mag er nicht sygk haben Sünder ein anclager so müst er ÿe sygk werdden wie wol er den sygk hat

Item vechten sie vor mÿttag So wirt er wünt oberhalbe der gürtel / Vÿchtt er aber nach mÿttag so wirt er wünt vnterhalb der gürttel

Item wölt Ir daññ wisßen In welchs glÿet einer wünt wirt / dar von ist gar hübsch zü sagen vör den lewten / So thut Im also Ir sult wisßen das ein ÿtzlicher tag zü teylt ist zü der kunste In xij stunde Der selbñ xij stund gehören vj vor mÿttag vnd vj nach myttag /

Item der tag seÿ kürtz ader