Page:MS 26-232 117r.png

Dein Sper Bricht
gegenn Reytten mach zw nicht

Glosa

Dw solt wissen wen einer auff dich reitt mit einer gleuen wie dw dich gegenn Im Schickenn solt mit deiner gleffenn also das dw Im die seinen ableytest vnd mit deiner treffest vnd die kunst soltu treibenn auß verschickickung [!] oder huetten merck der drey hutt sein drey mit der gantzen glefen vnd eine mit der halbenn

Item Schick dich also mit der Erstenn hütt

vaß dein gleuen auff das lengst vnter deim arm vnd halt Im den ortt gleich gegen dem gesicht

Item also Schick dich zw der andern hutt

waß die glefenn als vor vnd thw als sye dir zw Schwer sey vnd senck die nyder zw deiner linken seyttenn vnd halt sie neben deines Roß hals

Item die dritt hutt

vaß die glefenn mit den beyden henden In der mit vnd leg Sye for zwerchs auff den Satel

die vierd hutt gett aüß der halben glefen da soltu dich mit Schickenn vaß dein glefenn In der mit auff das lengst vnter den arm vnd halt Im den ortt gegenn dem gesicht

Item auch magstu die halben glefenn In der mitten habenn mit peyden henden vnd fur dich legen als die lang

Item die Schick die auß den vier hutten gen die dw hernach wol horenn wirst die soltu menlichen treybenn mit Sterck

Item darumb Spricht die ein figur die Sterck zu dem anheben darum dich Recht Schick

Ob es enpfall
sein end Im ebschnall

Hie merck wie dw die vier Stuck auß den vier hutten treibenn solt

Item auß der ersten wen dw die gleffenn auff das lengst geuast vnd mit Im zw Samen Reytest So thw gleich als dw Im In das gesicht wollest Stechenn In des las dein glefenn sinkenn vnd wechssel damit durch sein glefenn zw seyner rechten setten hin weck vnd die dein trifft

Item darumb