Page:Cod.44.A.8 068v.jpg

·:~Wiss das zw dem champf vechten nicht mer gehört denn ein abtritt vnd ein zw tritt vnd sünst vest gestanden Dar vmb das das man nicht müed werd Inn dem harnasch vnd dar vernÿm also Ist sach das er dich vber eÿlt hat das dw mit dem swert oder sünst zw kainer vorsatzu~g chumen magst So trit pald zw ruck mit dem vor gesatztm~ fuess vnd wart das dw Im Inndes pald wider an setzt oder pegreifst mit ringen mit eine~ zw trit des selbing fuess do dw vor mit abgetreten pist ~

Das ist der text vnd die glos von nach raÿsen zw champf

Volg allen treffen
den starcken wiltu sÿ effen
Wert er so zück
stich wert er Ja zw ÿm ruck

Glosa merck wiltu die starcken effen oder tewschen die do weit vñ lanck vechten vnd mit sterck ir dingk wellen vberwinden vnd von rechten kunsten nicht halden Die selbigen soltu vber eÿlen mit nach raÿsen vnd mit durch zucken Als dir ÿn dem nägstem stuck vor kler wirt

Hie merck das stuck ~

Merck wenn dw chëmpfen solt dëucht dich denn das dir dein kempfer zw starck wer So halt dein swert in einer hu°t vnd trit do mit künleich zw Im vnd merck gar eben wenn er sein swert an sich zeucht vnd wil stechen oder slachen mit dem knopf In dem so volg