Page:MS Thott.290.2º 001v.jpg

Beschliessung der höw

Wiltu daz dirß fechten glück
bïß frisch verhalt nit lang die stück
Darzuo hypschlich lachen
und die ernstlichen machen
Daz trow im Schwert
Die der talhofer lert
Im Schwert soltu nyemen trowen noch gelouben
So rint dir daz blut nit uber die ougen etc.

Jtem die Sloß der rechten kunst nach dem alß die maister Die abgetailt hand von genähe wegen daz ouch billich zu behaltent ist wen diß ist der recht grunde. Jtem zu dem ersten wenn du in ernst mit ainem fechten wilt, so luog wie du mit im abredst und uff wolche stund. Nach dem so richt dich nach notturft mit allem züg, und daz tuo selber haimlich und sag nymant waß du im sinn habest oder tun wöllest, wenn die welt ist also valsch. Und richt diu hentschuch nach deim vortail mit allem züg, Schwert und wameß, hosen, und waß du den bruchen wilt. Und merck aber wie du mit im abredst, dann darby wirt eß beliben, wan daz schwert hat sunst kain recht, dann daz es aigner und fryer will ist. Item wen du in den schrancken kumpst und an gan wilt, so lauß yederman sagen und tun waß er wöll, und sich nit hindersich, und hab den ernst im sinn. Und waß er mit dir red, da ker dich nit an, und ficht ernstlich für dich daz, und lauß im kain ruo, und trou und folg der kunst. Furcht nit sine sleg, und wil er ernstlich an dich, zuck innß treffen dz ?ich How wider fröhlich daran / spricht Hanß talhofer der guot man. Daz muß er für die warhait jehen / Wann eß ist im ouch wol eben dick und offt beschehen ~