Page:2º Cod.MS.Philos.62 02r.jpg

Vorrehde:

Zue Ehren vnd vnterthenigem Gefallen Dem durchlauchtigsten vnnd hochgebornen fursten vnd hern hern Johansen Friederichen hertzog zue Sachsen vnnd khurfursten meinem gnedigsten hern habe ich Fabian von Auerswald fur mich genommen die alte ehrliche vnd adeliche kunst des ritterschimpfs des ringens wie ich beÿ regierung weiland des durchlauchtigsten hochgebornen fursten vnd hern, hern Ernsten hertzogen zue sachsen vnd khurfursten, seliger vnd christlichen gedachtnus, solches von derselben weitberumbten ringmeistern, die dazumal beÿ sn. khurfl. G. zue hofe gewesen vnd die jugent als meine gnedigste vnd gendige hern, s. khurf., G. sohne vnd anderen fursten grafenn vnd heren vnd die von adel vnd mich gernet vnd in solchen ritterlichen vnd adelichen kunsten vnterweiset, zuesamen gezogen vnd mit artigen vnd lustigem gemälde vnd schriften in druck bringen lassen, welche auch die rechte art vnd kunst des ringens ist vnd vormals dergestalt nie an tag komen welches ich auf hochermelts meines g. f. vnd hern begern, mit verleihung gotlichen hulffe vollendet, vnd vielen ehrlichen vnd guten leuten zu nutz, ehren vnd fromen, zu ernstlichen vnd ritterschimpflichen sachen habe wollen ans licht bringen auch ist mein vnterthenigster dienst vnd freundliches bitten an wen von hohen oder niedern stand solche meine arbeit muhe vnd fleiß komen vnd gelangen wird er wolle dieselbig von mir zu gnaden gunsten vnd freundschaft annehmen, vnd mich vnd meine kinder ihm befolen sein laßen sonderlich dieweil ich unmehr ein alter verlebter man den ich bin in vierzehenhundert vnd zwei vnd sechsigsten jahr geboren Rtatis 75 an: vnd habe solche meine arbeit nach Christi vnseres lieben hern geburt 1537 Jahre zue Wittenbergk verfertigett

Guter Gesell nicht verzage
bis keck vnd ring wol die Wage