Page:MS KK5126 119v.jpg

Denn nicht vest so begreyff sein rechte hand mit deiner rechtenn vnd zeuch jn also do mit fur dich vnd mit der tenncken fass in bey dem elpogenn vnd mit dem tencken fuess schreyt fur sein rechtenn vnd ruchk in also dar vber so velt er oder wenn dw in mit dem rechten arm fur dich zeuchst so val im starck mit der prust darauf So prichstu im den arm

Wenn er dich anfelt mit ringen so begreyff mit der tencken hannd sein rechten arm vorn bey der hand vnd ruck in zw dir auf dein tencke seytenn vnd slach dein rechtenn arm mit sterck vber sein rechtenn in das gelenck des elpogenn vnd prich mit der tencken hand sein rechten arm vber deinen rechtenn fuess vnd spring mit dem rechten fuess hinder seinen rechtenn vnnd würff in dar vber

wenn dw chumbst mit dem leyb nachet an jn fert er dir dann mit dem tencken arm<e> fur dein rechten achsel vmb den hals so var mit dem rechten arm aussen vber seinen tencken vber das gelennck des elpogenn vnd chum mit der tenncken hannt der rechten zw hilf vnd druck do mit vndersich vnd spring mit dem rechten fuess fur sein tencken vnd went dich von jm auf dein tencke seytenn so velt er

wenn er dir felt mit paidenn hennden jn denn arm vnd fert dir domit durch hinden vmb denn leyb so schlach mit dem rechten arm starck von oben nyder jn das gelennck seins tencken elpogenn vnd schreyt mit dem rechtenn fuess für sein denncken vnnd wennd dich von jm

wen dw jn hast geuast bey dem arm vnd er dich wider hat er denn einen fues fur geseczt vnnd helt denn gerachkt so stoss mit einem fuess auf das selbig knie vder stos in zw denn hodenn vnd wart das er dir denn fuess nit begreyff da mit dw im zue stost oder wenn dw ein fues vor seczt so peug das knye fur dich so mag er dir mit dem stoss zw dem chnye nit geschadenn vnd das merck gar eben

wenn dw mit im ringen wild greyft er denn nach dir mit aufgedonen oder mit gerechten fingernn oder begreyft dich mit ringen vnd helt dich vesst so wart dw ob dw jn mit einem finger begreyffen mügst vnd prich im denn vbersich vnd fuer in do mit zw dem kraiss da mit gewingst dw jm auch die seyt ann vnnd sunnst vortail vil

wenn dw in nyder würffst vnnd er felt auf d seinen pauch vnd reckt den arm von jm vnnd knye ym pald mit einem chnye auf seinen arm jn dem glenck des elpogenns vnd begreyff jm den selbigenn arm vorn mit einer hannt vnnd ruck do mit vbersich so pricht er

[W]yrfst dw jn nyder vnd felt auf seinen pauch so sicz pald auf in vnnd begreyff in bey einem arm vnd zuck in den auf seinem ruck vnnd halt den vest mit einer hant so chan er nit auf chomen

oder wild dw im den arm prechenn den dw im heldest mit der ainen hannt so heb mit der ander<e>n hannt den elpogenn vber sich so prichst dw jm denn arm

wurffs dw in nyder vnd er felt nyder auf denn ruck so val im mit dem leyb die twier vber sein anntlücz vnd fass in bey dem hals vnden einen arm vnd halt in also vast vnd mit der anndern hannt ruck jm die hannd aus da mit er sich behelffenn wil so mag er nit auf chumen

Der text vonn der wer die zw dem chambp gehort

Jn all<er> ler
dein art geg<e>n der plos ker

jst das dw mit aller wer die zw dem champf fechten gehort wissen solt mit denn ortter<e>n an dem gewapnetem man die ploss recht