Ist er stercker dan dw So far Inwendig auff vber sein linkenn arm mit deiner Rechtenn Oder Ist er schwecher dan dw so var aussenn vber sein linken arm vnd kum mit deiner linken hand der R zw hilff vnd truck vast nyder vnd weicht er aber mit dem arm so begreiff Im den mit der L hand vnd mit der Rechten starck dar vber vnd reitt fur dich so velt er
Item hat er sein linken an d elbogen an denn R arm gesetzt so begreiff sein linke hant mit deiner linken vnd nim den vnge nanten finger
Jagt man dich Rechtes
ker vmb wart vechtens
mit armenn fahenn
so mag dir kein schad nahen
Das ist das dw merkenn solt wan dw mit eynem zw samen Reyten solt Ob er dir zw der Rechtenn seytenn woll zw reitenn vnd dir den vorteil angewinnenn so las Inn dar zw nit komen sunder wend dich alweg mit deiner .L. seytenn zw seyner R vnd ward das dw nahend an Inn kümst vnd wart seins R arm mit dem ringenn vnd senckenn die da vor vnd nachgeschribenn stenn
Item wer das sach das dw gedrungenn wurst das dw fliehenn müst vnd reitt dir dan eyner hinden zw deiner Rechtenn seytenn mit eynem Spieß oder schwertt vnd wolt dir ansetzenn so wind dich auß dem stich gegenn Im auff dein linke seyttenn vnd wind mit deinem schwertt gegen seinem Spieß oder schwertt das dein dawm vnten kum vnd setz Im an
Item reitt er dir zw der l seytenn So wend dich auff dein R seyttenn gegenn Im vnd wind mit dem Schwert als vor vnd setz Im an
Item das lert die 24 figur die spricht ob man dich Jagt von peydenn seytenn ker vmb linck so er Recht kompt
Item auch soltu In der flucht behend sein also das dw dich wol künest vmb wendenn In dem satell von eyner seytenn zw der andern
