Item wiltu in nith werffen wen du im mith der lincken hant den ellenpogen begryffen hast, so begreyff seyn schwert bey dem knopff mith der rechten hant, und zeych es zu dyr mith der lyncken hant, stos im den ellenpogen von dyr, so nimst im das schwert
& figura
Item darumb sprycht dye dryte fygur mit streyffen satel oder nym im dy wer etc. oder nym in den sonen zeygen
Item greyfft er dyr mith der rechten hant und mith deynner lincken durch, vach den zaum, so vach im dy hant mit deynem zaum
Item vert er dyr mit der rechten hant vorn an dye brust oder an den hals, so begreyff in bey der hant mith deyner rechten und thu im den ungenanten gryff oder went deyn ros von in, so felt er etc
Item wenn du mit deyner rechten hant dy seyn begreyffst, so nym das gewycht mit deyner lyncken bey dem ellenbogen, auch machst du den verborgen gryff mit nemen ob du wylt etc
Item dye stuck threyb, du wen du mit im eynher reytest zu seynner rechten seyten
Nota
Ob du mith der lyncken seyten nit magest an in komen, wen ir gefeit habet mit der gleffen, so reyt mit deyner rechten seytten und wyrff in mit dem sunnen zeigen
