Text von dem verporgn ringn
[W]iltu aber dich massen
des vahens liecht von dir lassen
ringens den fure
gefangn hin ane schnure
Glosa [D]as ist ein verporgens ringen zu roß und hat nicht namen als die andern ringn haben das sol man an das licht nit lassen kimen noch yden man sehn lassen ∻
Das treib also
[W]enn du mit im zu samen reytest so wart das du im kumpst mit deiner lincken seytn an sein rechte unnd begraiff mit der rechten hant sein rechte unnd ruck die fur dich unnd mit der lincken hant begreiff sein rechten elenbogen und stos den ubersich und peug im mit der rechtn hant sein rechten arm gar wol oben uber deinenn linckn und heb mit dem lincken arm ubersich also ist er gefangen an alle pant und magst in also füren wo dw hin wild oder denn arm~ prechn.
