sein swert getzogen oder sünst ein ander wer vnd wil dich slachen oder stechen So begreiff mit der rechten hant sein rechte vnd ruck sy für dein prust vnd leg dich mit dem leib starck dar auff vnd reitt für dich So prichstu Im den arm~ oder er muß vallen Oder wiltu in nicht werffen wenn du seinen arm~ für dich geruckt hast So begreiff mit der lincken hant seinen rechten elpogen vnd stos da mit von dir vnd mit der rechten begreiff sein swertz knopf vnd rück den zu° dir so nÿmpstu ÿm sein swert
Das lert die dreÿ vnd tzwaintzigist figur Die spricht also Der vngenant grif were nÿmpt oder veltt In ~
Das ist der text vnd die glos von dem sunnen tzaigen
Wiltu an fassen
Neben reittens nicht soltu lassen
Das sunnen zaigen
linck erm~l treib wiltu naigen
Das vor haubt taste
gegen nack druck sere vaste
Das er sich schwëncket
vnd selden wider auf gelencket
Glosa merck das sunnen zaigen ist ein guet ringen zw° ross Das magstu treiben zw allen seitten wenn dw nahent am den man kumpst
Merck das treib also
Wenn dw mit ym zw° sãmen reittest vnd wild ringen So halt dich nahent zu° ym chumpstu denn mit deiner rechten seitten an die sein So var mit der lincken hant hinden vmb ÿn ~
