sein rechte vnd ruck ÿn für dich vnder dein prust vnd var mit dem rechten arm~ vber seinen rechten vnd begreiff do mit deinen satelpogen vnd leg dich mit dem leib starck dar auf vnd reit für dich So zeuchstu In vom ross
Das lert die xiij figur Die spricht also der schaff griff wert alle griff ringens vnder augen
Das ist der text vnd die glos wie man prechen sol ettliche Ringen zw° Ross
Wer dich an vellet
wider reittens der wirt gesellet
hangens zw° der erden
Vbergreiff In recht mit geperden
Glosa
Merck das ist wenn dw mit einem zw° sãmen reittest chumpstu denn mit deiner rechten seitten an die sein vert er denn mit dem rechten arm~ vber dein lincke achsel vorñ vmb den hals vnd wil dich also vom ross zÿehen So vall ÿm auch also vmb den seinen vnd var mit der lincken hant hynden vmb ÿn vnd begreiff do mit dein rechte hant vnd ruck in mit paiden henden zu° dir auf die seittñ So mües er vom ross vallen
·Oder
wenn er dir mit dem rechtñ arm~ vorñ vber dein lincke achsel vmb den hals vert So slach dein rechten arm~ oben vber seinen rechten vnd wurff In mit dem schaff griff ~
Das ist ein ander pruch
