Item oder griff In die mit dines messers mit diner lincken hant der rechten zu hilff vnd riß starck vff din lincke siten vnd druck oben nider mit der lincken hant vnd spring mit dinen rechten fus fur sinen lincken vnd wurff in dar vber also hastu wider dz erst stueck ~
Sequitur mit messer wil er kelln drucken
Mit messer wil er kelln drucken
Die were soltu rucken
Nit lang thün peytten
Ansetzen oder recht pis schritten
Hie saget der meinster eyn wider bruch wider den gemelten bruch vnd spricht mit messer wil / Daß soltu also verstan wan du eynem vber sin messer pist gefallen vnd er wil dir din kell drucken als oben geschriben stot Indes nym sin messer bÿ der klingen mit diner rechten hant oder gehultz vnd druck die klingen sines messers vast an dich in din rechte siten vnd far mit diner lincken hant oben vff sin rechte Inwendig an sin pindt sins messers vnd riß starck vff din rechten siten so nÿmpstu Im dz messer ~
