Item merckh wenn du mit dem zu vechten zu Im kumbst. so secz dein lincken fuß vor. ee wann Er dir an das schwert pindt. vnd halt Im den ort lanckh auß geräckten armen gegen dem gesicht. oder der prust. hawt Er dir denn oben ein zu dem kopff. so wind mit schwert gegen sein haw. vnd stich jm oben zu dem gesicht.
oder hawt er von oben nider. oder von vnden auff. dir zu dem schwert. vnd will dir den ort wegkhschlach(en) so wechsell durch. vnd stich jm zu der andern seiten. zu der plöß.
oder trifft Er dir mit dem haw das schwert mit sterckh. so laß vmb schnappen. so triffstu in zu dem kopff.
laufft Er dir ein. so treib den schnit. oder wart der Ringen. ~
Text.
Wer wol furet vnd recht pricht.
vnd endtlich gar bericht.
vnnd be sunder.
yedlichs in drey wunder.
wer recht wol hengt.
vnd winden damit pringt.
vnd winden acht.
mit rechten wegen betracht.
vnd Ie Jr aine.
der winden selb drit Ich maine.
so sind Ir zwainczig.
vnd vier zel sy ainczig.
von baiden seitten.
acht winden lern mit schreiten.
vnd prueff die geferrte.
nicht mer nur waich oder herte.
Glosa. Das ist ein ler. da die kunst der zetell kurcz jnn begriffen ist. die lert also. Das du in der kunst geuebt. vnd bericht solt sein. also das du alle gefert vnd stuckh behendigclich darauß kündest fueren. gegen dem da du mit vichst. das du deinen pruch gegen seinen stucken also gerecht wissest zetreiben. Das du auß ainem Jeden pruch be/sunder mügst gearbaiten mit drey wundern.
auch soltu wol hengen am schwert. vnd auß dem hengen soltu pringen. acht winden. vnd die winden soltu betrachten also vnd recht wegen. Das du der ains selb drit wissen zutreibenn ~
Item das vernymb also. es seind vier anpinden der schwert. zway oben. zway vnden. nu soltu auß jedem anpinden be/sunder treiben. zway winden.
dem thue also. Wenn du mit
