Ittem stich Im auß der vnnder hutt, zum gemecht, zuck wüder vnnd las dein binnd fachrenn aus der Rechten hanndt vnnd greüff domit Inn die klingen schlecht Er, so nim mit deinem gehils Aus von der Rechten gegen seiner lincken Im außnemen las dein gehils, vmb den kopff fahren, vnd schlag Im zu seim für gesezten kniebüg, thritt behenndt Ein thrit hinder sich, domitt du dich Erhalst vnd dein bindt wüder Ergreüffest ¶
Aus düsenn bis hieher geschrübenn stuckenn ist hoffich gnug v[er]stendig wie mann die schleg soll zu werck brinngen, vnnd ist zu mercken das sich Einer hüetten soll so viel Er kann vor Annsezenn oder Rinngenn er habe Inn dann zum Erstenn sehr geschwecht mit donerschlegenn als zum Enckell, zur knibüg, zu denn gelennckenn Ann Armbüg vnd Annderen blößenn, wann Er Also Er midett ist vnnd mit schlegenn geschwecht, Als dann greüff ann mit annsezenn ¶ zuuor soltu Im nit sthenn, sonder Imer algemechlich weichen vnd In verzoblen laßenn, doch Aber wo du Ein fortheill Ersehest das der nit vnfrucht barlich versaumett werde ¶
