¶ Wiltu machen das petersilge vor den lewten czusehende wachse in eÿner stunde So nÿm petersilien somen vnd lege in yn gebranten weÿn vnd loz in dorynne legen eyne gute weÿle dor zo nÿm den zomen vnd strewe in of truege fuechte erde dy geÿl sey vnd cleÿne gereden zo wechset zi gar schire czu sehende
Aliud/ · Ader / nym petersilien zamen vnd tu den er in guten starken essik vnd loz in dorynne legen eynen tag vnd rÿne nacht wen das nue geschiet zo nym denne chaw vnd asche vnd menge das vndereynnander das is nicht czu dicke noch czu duenne werde vnd nym denne den zomen vnd strewe ader zehe in of das gemenge von den chalwe vnd der aschen vnd nym denne andere warme asche vnd strewe sÿ dorof / & videbis
Aliud/ · Ader nÿm bonstengel vnd bruee sÿ czu aschen vnd nym denne petrisilgen zomen vnd lege in ÿn guten starken weÿn vnd loz in dorynne legen vier tag vnd vier nacht ader lenger is der weyn nicht stark genuk vnd nÿm denne den be zomen aus dem weÿne vnd loz in trucken werden vnd nÿm denne trucken erde dÿ gar cleÿn sÿ vnd gereden durch eÿn tuch Vnd nÿm denne dez selben ertrichz czweÿteÿl vnd der vorgenanten aschen eÿn teÿl vnd tu is mit eynander alzo gemengt in eÿne schuessel vnd strew denne den petersilien zomen dorof vnd besprenge is denne mit lawterm regen wasser / vnd decke denne eyn mantel doroeber eyn cleÿne weÿle vnd heb in denne off zo siestu schoene petercilien gewachzen voer dir &c.
Aliud/ ¶ Aber nym kerbes zomen ader pfeben zo vnd lege in yn menschen blut vnd loz in dorynne legen an der zonnen vij tage dornoch nym sy her aus vnd tu is ÿn eyn butel ader taschen vnd nym denne geile veiste erden vnd trucken sÿ vnd czu reis sy gar kleyne vnd tu sÿ auch in eyn tuechel wen du denne wilt zo schot das puluer of dÿ erden
