Theylung des Schwerts zur Schwech und sterck
Das schwert wirt getheilt erstlich in zwey theil nemblich vom heft bis in die mit der clingen welches ist die sterck vonn der mit bis vornen auß ist die schweche. Ferner wirt das schwert getheilt in 4 theil wie die figur hie undenn ausweist, mit dem innern theil, das ist das heft, wirt verstandenn die arbeit mit dem knopf sampt dem creutz unnd heft, in andern theil darnach wurt verstanden die arbeit mit schneidenn und drucken unnd was zur sterck gehoert. Vom dritten theil des schwerts ist zu mercken die wandelbare arbeit zu schwech und sterck nach gelegennheit und gefallen. Das ausserst ist allein der[1] schwech zu gehoerig mit arbeitenn zur bloeß.
Hert unnd weich.
Das soltu merkenn in banden des schwerts, do wirstu fulenn ob er hert oder weich angebundenn hab mit hewenn. Item ob er starck oder weich in widerhaltenn sey und ist sich gewonlich mehr zu hutenn vor denn weichenn dan vor denn starcken banden, wie hernach in fechtenn zu sehenn ist.
Domit aber das schwert fechtenn unnd nachgeschribene stuck desto verstendtlicher sey so wil ich meinen nachgesetztenn zedel erklerenn wie ich die wort verstanden wil haben, nach oberzelter ordnung nemblich anfang, mittel, unnd endt.
- ↑ This word overwrites an initial “die”.
