Den Zurckel den laß riren
Bhalt hoch dein hendt wilt ihn verfiren.
Der zürckel kompt auch auß den krumphewen und ist ein sonderlich guth stuck zum verfiren fur andern, dan es nit lehr und vergeben fur laufft, wie andere verfirliche stuck, als ablauffen und dergleichen sonder so man ihn recht macht, triffet der zurckel sehr hartt mit der halben schneiden in furlauff. Das stuck treib also: wan du (nach dem du mit dem angriff under sein schwerdt khommen bist) fur eim sthest in bundt, und dein schwert in der hohe ob dem haubt firest, so bald er dir platz last, das er dir nicht nach dem schwerdt bindt, sonder fiert sein schwerdt auch hoch mit dem orth uber sich, so verschrenck dein hend in der luft, unnd haw mit kurtzer schneid also geschrenckt von oben nider, zu sein rechten ohr, das dein kling gleich wol sein treff oder nicht, neben seinem rechten arm furvber in einem zurckel erumb lauff, und behalt in dessen gleichwol die hend hoch uber deinen haubt, so baldt er dem zürckel nach wuscht, so thrit mit deinem lincken fuß wol uff sein recht seitten auß, und haw mit langer schneid hinder seiner klingen uber sein rechten arm, zum kopf, nhim den leib mit dem thrit wol auß, uff dein linck seitten, mit deim haw auß seinem streich. ¶
