neben der halbenn schneidenn, büstu aber weitt von im hawett er dir nach denn henndenn, so hewe Im nach dem kopff, Dorumb hiet dich vor versezenn, so bistu sicher vor finger lezenn, haw aber gleich In mit dem mitt so pringt ein Jeder haw sein versazung mit ende ⁋
Folgett das annder will des schwert fechtens dorinnen gelert wirtt, Wie man sich den leger vnd hew, sampt Ir zugehörig arbeitt so Im ersten will gelert ferner inn brauch pringen soll ⁋
Ich württ hierinen nicht viell vonn den hewen vnnd schulerischen dingen sagen sonnder die reimen erkleren welche von den Alten darumb mit verborgenen worttenn gemacht seindt domit die kunst nit zugemein werde Vnnd, von den legernn, Anbinden, Abschießen, Pleiben, Winden, Nachreisen, Durchlaufen, vnnd denenn so hernach Im Inndes gemelt seindt
