nebenn hut, so mus er weren vnnd anngreiffen, wan er angreiffen hatt so halt dich des spruchs wenn es gliez oben, standt ab das will ich loben, wan do kumenn von studen an streich ann streich[!], Zwürch an zwierh, trit an trit, schnit an schnit, welcher do bald bedacht ist, der Zeucht vor ⁋
Was sich woll zwürcht, Seinn haupt mit sprinngenn verfierett ⁋
Das ist war, wann du woll in die zwürch springest, So ist dein Zwürch auff dem haupt des mans der mit dir ficht, fest geferlich, dan es gett tieff zuu ohrenn ⁋
Feler verfierett,
Nach winschen rirett ⁋
Welcher denn langenn feler recht nimbt vnnd trit heimlich in driangell mit dem rechten fus gegenn des mans rechttenn seitten, leßen denn feler woll fliegen, der rieret oder drit nach wunsch denn es ist sehen einer der in woll bricht oder versezt ⁋
Verkerer zwinngt
Durchlauffen auch mit ringt
Das heist verkerer wann du zwischen dem man vnnd seinem schwert drinen[1] bist, dein knopff über sich dein halb schneidt an seiner halben schneidt do zwingstu den man das er nit arbeittenn mag, wiltu dan durchlauffenn, dz ist nach seim haw oder durch seinem rechtem
arm fürlauffenn, das ist nach seim haw, so magstu gleich anfangenn zu ringen
- ↑ Unclear.
