Der Erst Reimb ⁋
Vor vnnd noch zwej ding 3 Sinnd aller kunst ein vrsprunng ⁋
Schwech vnnd sterck ⁋ Inndes das wortt domit merck ⁋
So magstu Lernen kunst ⁋ Domit dich Ewren kannst
Erschrückestu gernn ⁋ keinn Fechtten nit lehr ⁋
Dieweill ich vornen gnugsam vonn, vor, vnnd, noch, Schwech, vnnd sterck gelert habe will ich alein das wortt Indes erkleren welches wort nit anderst in Im hatt dan ein ernstliche vermanug zu behender bedachtlicheüt Nemlich wan ich einer Plöß zu schlag nit erst bedenck wie ich zur andern schlagen woll, sonder ein haw gleich mit die furderlichste Plöß ersechenn ⁋
Inndes ⁋
Ann dem wort Inndes stehtt alle kunst des fechtens dann es beschleust alle ding wie Liechtenawers alten Zedell vnd ander Zedell daruon sagenn ⁋ wie dann in den reimen hernach zusechen ⁋
Inndes bricht, Indes sticht Indes truckt Indes zuckt, Indes reist noh, Indes ist nit zu gach, Inndes pricht die gfert ob sie sein weich oder hert, Indes gett hinann, Inndes sucht ohn fercht den man, Indes ringt, Inndes zwingt, Inndes bindt nit ann, Inndes verfirtt den man, Indes schlechst zu den Plößen, Indes stest mit stoßen, Inndes mit dem schnitt, beßer arbeüt feidt man nit, Inndes nimbt das schwert Indes thut waß dem hertz begert ⁋
Inndes heb acht vor steh mich recht ⁋
Inn trieff eher sein leger schlecht ⁋
