pindet Darumb haw von der rechten seitten So magstu starck an dem swert mit kunst arbeitten was dw wilt Desgleichen bistu linck so haw auch nit von der rechten seitten Wann die kunst ist gar wild ainem lincken zetreiben von der rechten seitten desgleich ist auch ainem rechten von der lincken seitten
Ain text ainer lere von dem vor und nach
Vor und nach die zway ding /
Send aller kunst ain urspring
Schwech und stercke /
Indes das wort domit mercke
So magstu leren
mit kunst arbaiten und weren /
Erschrickst dw gerne
kain vechten nymmer lerne /
Glosa Das ist das dw vor allen sachen solt recht versteen und vernemen die zwai ding das ist das vor und das nach Darnach swech und sterck des swertz und des wortz indeβ darauβ kumpt der gantz grundt und ursprung aller kunst des vechtens Wann dw die ding recht vernimbst und vorauβ das wort indeβ nit vergist in allen stucken die dw treibt bistu wol ain guter maister
Das vor
Das vor ist das dw albeg vor kummen solt ob du wolt mit ainem haw oder mit ainem stich im zw der plösse ee wann er dir zw deiner plösse So muβ er dir versetzen So arbait in der versatzung behentlich für dich mit dem swert von ainer plössen zw der anderen So mag er vor deiner arbait zw seiner nicht kummen Aber laufft er dir ein so khum vor mit dem ringen oder ort lauffen
Das nach
Das nach ist so dw dem vor nit kummen magst oder sunst nit dem nemen wöllest so wart auf das nach das send die prüch auff alle stuck die er auf dich treibt das vernim also wann er vor kumbt das dw im versetzen must So arbait mit der versatzung indeβ behentlich für dich zw der nächsten plösse So triffstu in ee wann er sein stuck verbringt Also gewinstu aber das vor und er pleibt nach
Auch soltu in dem nach und in dem vor mercken wie dw mit dem wort indeβ arbaiten solt nach swech und nach sterck seines swertes und das vernym also Von dem gehiltz des swertz biβ in die mitte der klingen hat das swert sein stercke damit dw wol magst widerhalten wann man dir darein pindet und fürbaβ von der mitten biβ an das ort hat es sein schwech da magstu
