Und so er dir der ansetzen ains versetzt so schlag in mit dem knopf zw der anderen seiner lincken seitten Oder var ym mit dem knopf über sein rechte achsel vornen an den hals doch spring ym mit deinem rechten fues hinder seinen lincken und darüber geruckt und geworffen
Bruch nym den elenpogen
Item dw magst auch auβ dem standt des zornortz neben deinem lincken knye wie hernach in den siben stenden gelert wirt an vier enden ansetzen oben nach baiden seitten darnach er dir mit oberhewen kumpt darnach setz ym den ort an den hals kumpt er aber mit underhewen setz ym aber an nach dem und er dir nach der seitten kumbt und vollende dein arbait
Von dem nachraisenn ain lere
Nachraisen lere /
zwifach oder schneid in die were /
Glosa Am ersten soltu mercken ain gemaine lere das der nachraisen vil sindt und mancherlai und gehören zetreiben mit grosser fürsichtikeit gegen den vechtern die aus freyen und aus langen hewen vechtend und sunst mit rechter kunst des swertes nit hawen etc Und nach dem text ist das dw die nachraisen wol lernen sollt Wann sy sindt zwaierlai
Die ersten treib also So er dir oben ein will hawen So merck weil er das swert auff zeucht zw dem schlag so raiβ ym nach mit dem haw oder mit ainem stich Und triff yn zw der oberen plös ee er mit dem haw nider kumpt Und ob er dir anpünde und darnach von dem swert arbaiten wolt so volg nach und nym indeβ / hinach den schnit mit der langen schneiden oben ein zw dem armen und druck starck yn domit von dir etc So hat er kain macht Also raise ym alltzeit starck nach oben zw dem kopf
Ain ander stuck
Das ander nachraisen ist Wann er dir von oben zuhawt lest er dann sein swert mit dem haw zw der erden So raiβ ym nach mit ainem haw oben ein zw dem kopf Ee er mit dem swert aufkumbt Oder will er dich stechen So merck weil er das swert zw ym zeucht zw dem stich so raiβ ym nach und stich ee dann er sein stich verbringt etc
Vichstu aber gegen ainen aus underhewen oder aus den streichen oder ligst gegen ym im alber oder pflueg velt er dir dann mit dem swert auf
