Text vom Zuckn am schwert
Trit nahent in punden
das zuckn gibt gut funde
zuck trift er zuck mer
arbeit erfinde das thuet im we
zuck alln treffn
den meistern wiltu sie effen
Das Zuckn gehort zutreibn gegenn denn meistern die do starck an das schwert pindenn unnd am pandt des schwerts beleibn stilsten und wartn ob man sich von in ab wolt hauen oder vom schwert abzyhn das sie denn mochten nachgereisen zu der plos wiltu die selbigenn meister effen oder theuschn, so treib die zuckn gegenn im also hau im von der rechten seitn obn starck ein zu zu dem kopf vert er den mit dem schwert starck fur mit dem hau unnd wil vorsetzn oder haut dir zu dem schwert so zuck dein schwert andich ee wenn er dir anbindt und stich im zur andern seitn und das thu gegn allen treffen und anpindn des schwerts
