ortt gegenn dem man
Stee vnnd In die hutt soltu auß allenn dreien hutten kumen Also wen dw Im Stichst zw der ploes vnd das der ortt hafft In dem harnaschs So wind alweg dein gehultz an dein prust vnd dring In also von dir hinweg vnd las In nicht abkomenn von dem ortt So mag er weder Stechen noch Schlagen
merck alles das dw wild ansetzen das setz an das gesicht oder an den hals oder an sein linke achsseln oder vnter sein linke vchsseln vnd wen dw Im hast angesetzt Ist er den lenger den dw pist so dring In also von dir hin das dein ortt vbersich auff gee vnd Im wol In die ring gesetzt sey
Item Oder Ist er kurtzer wen dw pist So las dein Schwertt mit dem knopff zw deiner Rechten seytten vntersich ab sincken bis auff die Rechten huff vnd das dein ortt vber sich Stee vnd Im In die ring wol gesetzt sey als vor vnnd dring In also fur dich vnd las In von dem Schwertt nit abkomen
Das ist der text vonn dem vor vnd von Nach
Vor vnnd nach die zwey ding
pruff weißlich lere mit abspring
Glosa das Ist das dw von allen Sachenn solt wissenn das vor vnd das nach wen auß denn weyenn dingen gett alle kunst
