unnd er will dich in kain zwirch lassen, so brich ine auß, unnd gee mit ime ein weil umb, und dauch ine fasst zuruck, unnd gehlinng zuck an dich, und fare ine mit deinem kopff durch seinen rechtenn arm, unnd mit deinem rechten arm, durch seinen rechten fuß: unnd heb ime auf.
Nota.
Item So dich ainer allso gefasst hat, allsuor, so recke die füss weit hinndan von dir, unnd lege dich oben auf ine, unnd schwere dich nider zur erden, und hütte dich, das er dir keinen fuß ergreif, unnd lauffe fasst umb mit ime, so wirfstu ine nider.
Nota.
Item So sich ainer allso auf dich legt, so fasse ime seine bede arm zusammen, und hallt s ime fasst, unnd winnde dich hinnder ime umb, an den ruggen, unnd reck dich mit den füssen lanng hindan, so wirfstu ine auf den ruggen, unnd geet zu beden seitten.
Ein annders.
Item Legt sich ainer schwer auf dich, das du dich auß ime nit winnden magst, so fasse ime seine beder Armen, unnd hebe ine starck, unnd setz gehlinng nider
