Adpositio hastae contra remotionem per ensem.
Ita in hanc pugnam te accommodabis: in mutuo congressu sinistrum pedem praeponas abiecto scuto. Et inde ensem hastamque manu utraque coniunctim corripias, collique hostilis partem sinistram hastae mucrone fodito. Verum si is idem contra te molitus fuerit, sinistrum itidem praefigentem, versum latus sinistrum scuto hostilem impetum excipias. Post abiecto clypeo et hasta sinistrum retrahas pedem atque educto gladio repente rursus intro procedas, capulo dextra adprehenso, sinistra medio ense, interius mucrone eius cubitum adversarii sinistrum pungas. Id si is exceperit hastae anteriori parte, levato confestim ense, gemino ictu buculam ipsius pungas, et inde ab hoste recedas.
