vnd reytt fur So muß er aber hinweck Item fert er hoch mit den armen er hab ein Schwert oder nicht So greiff mit der Rechten hand sein Elnbogenn mit dem R fus erheb Im sein rechten So muß er fallen Item hat er ein Schwert So greiff Inn mit der linken hand sein R elbogenen [!] vnd mit der rechten hand sein Schwert pey dem knopff vnd Stoß mit deiner linken vnd zeuch mit der Rechten das schwert zw dir So nymstu es Im Item darumb Spricht die elfft figur Ruck fast stos von zawm vnd Such sein messer
Das glefenn stechenn
vechtenn sittlichenn hutt ler prechenn
Das soltu also vernemen vnd auch wiß das dw mit der glefenn hurten noch rauschenn wan dw solt damit sittlichen reitten vnd nit rennen wan der da rent vnd hutt nit der gleuen der mag noch kan da mit kein kunst getreibenn noch vortheil Suchenn Item wen dw Sittlichenn reytest So magstu mit der gleu die Stuck wol brauchenn die vor dir geschribenn Stenn Darumb Spricht die xxvij figur das Ist In dem Sperlauff der dem andern begegent vnter augenn Item das ist das dw sittiglichenn solt reyttenn mit der gleuen zw Ros oder mit dem Schwert vnd mit dem Ringenn soltu behennd sein zw Roß vnd nit lancksam vnd als dw hernach wol horen wirdest Item hie sein außgericht die vier hutt mit der glefen
Hie hebenn Sich an die vier hutt mit dem Schwertt zw roß
Die Erst hutt leg dein Schwertt mit der mitte auff die linck hand zw dem zawm Item die ander hutt halt dein Schwertt neben dir an dem R pain vnd das der ortt vber sich Stee gegenn dem man Item die dritt hutt setz denn knopff deins Schwertzs an den satelbogenn vnd halt den ortt gegen dem man Item die vierd hutt halt dein Schwertt hoch auff deiner Rechten seittenn das dein
