Zur 10.vnd 11. figura welche das Rhad vor dem Manne genennet wirrtt
In dieser figura wird des rechten schenckels gedacht, kan doch auch wol lincks gebrauchet werden doch das man sehe, welchen schenckel der ander zuefodderst hat, hat er seinen rechten vor, so nimpt man auch den rechten vor, hat er den linkcen vor so mus man auch den lincken fus vor nehmen, vnd geschiht also wen ich meinen mit beiden henden an seine arm zwischen den achseln vnd ellebog’ greiffe ziehe mit einem arm seidlinges zue mir, vnd schube mit dem anderen von mir, vnd strecke zuegleich auf demselbigen seiten da ich mit der hand zue mir ziehe, meinen schenckel fur seinen schenckell vnd schwencke ihn seidlinges zur erden, wie die nachfolgenden figura weiter aus weiset, welche eine erklerung dieser jegenwertig’ figura ist.
