Item wie aber zwen mann nit mit ainender mügent kempfen und wolcher wil under den den zweye dem andern wol uß gan mag ~
Item wenn zween mann gefrunt sind biß uff die fünffte sipp oder näher die mügent durch recht nit mit ein ander kempfen und des müssen siben mann schwern die die vatter und muoter halb mäge sind. ~ ~
Item wie aber ainer dem andern kampfes absin mag mit solichem gelimpf alß hie geschriben stät
Item ob ain lamer man oder ainer der böse ougen hett und kampfes an gesprochen wirt der mag sich der auch wol behellffen und dem gesunden us gan, Eß sy denn daz wyse lüt daz gelich nach der person machen und daz müssent wyß lüt uff ir aid tun und daz also glich machen. Es mag auch der lam oder mit den bosen ougen wol ainen an Ir statt gewinnen der für Iro ainen kempfe. ~ ~
Item wenn also die sechß wochen uß sind und der letst tag komen ist den in der richter beschaiden haut daruff kempfen sullen, So sullen sie beide für den richter komen mit solichem ertzögen und in solicher acht alß die gewonheit und das recht lert In dem lande dar Inn sie kempfen sullen oder nach dem alß sie mit einander gewillkürt habent Item etc. ~
Item so soll da der cleger schweren daz er der sach darumb er dem ainen man zugesprochen haut schuldig sy und denn so sol man in ainen ring machen und grieß wartten und urttail geben
