Zuck dy treffen
Den meystren wiltu sy effen
Will er auff dich pinden
Zuck schnel so wirstu In finden
Hie sagtt der meyster wye man Im messer zucken soll vnd wiß das daß zucken ist auch der haubtstuck Eynes vnd ist vill vnd manchlay vnd gehoren zu treyben gegen den meystren dy starck an das messer pinden vnd starck In der versatzung sindt wiltu dy selbigen meyster effen vnd Teuschen So mach dy zucken gegen In also pindt mit dem Entrusthaw an seyn messer auff seyner linckn seytten Indes haw mit dem selben haw zu seyner rechten seytten vnd wenn dy messer zusammen klitzen Indes zuck mit dem arme Eyn benigs zu ruck vnd mach auß dem schlag Eyn stich vnd stich Im zucken auff seyn lincke seytten zu dem gesicht etc
