¶ Beschluß des langen Schwerdts.
Wer wol bricht /
Und endtlich bericht /
Bricht besunder /
Jeglichs in drei wunder.
Wer recht wol hengt /
Und winden recht mitt brengt /
Und winden achtet /
Mit rechten sinnen betrachtet /
Und so ihr eine /
Der winden selb trit ich meyne /
So sind ihr zweintzig
Und vier / zäl sie eintzig /
Von baiden seitten /
Acht winden / damit ler streiten /
Brüff die gferte /
Weych oder hertte.
Zu dem kurtzen Schwerdt.
Das kurtz schwerdt dich bericht /
Wer gegen dir sticht /
Mit deinem schilt /
Wiltu einen machen milt /
Fünff ler /
Die mit rechten sinnen ker /
Zwen auff der rechten /
Darmit ler fechten /
Sovil auff der lincken /
Schick dich nit einwencken /
Und vor einem
Laß dir nit vermeynen.
Ist einer oben /
Bleib unden / thu ich loben.
Mit deinem schilt lern absetzen /
Wind ein / wilt meister letzen
Leßt er das /
Greif zwischen die beyn / nit laß.
Trit bricht /
Was man macht / er zunicht.
Ob er dir oben remt /
Greiff schwert / far in die mit / der würdt beschemt.
Durchgeh kumpt dir einer unden /
Setz ab / greiff zu dem hals / so magstu ihn wunden.
Stangen / schwert / mach winden in /
Bring knopff zusamen / so hastu gewin.
Von beden seitten lern inwinden
So magstu kunst finden.
Nicht halt dich zu nahet /
Das du nit werdest ergahet.
Schnelliglich volg / so du es ersihest /
Damit du ein betriegest.