Schwert Fechtenn
Erstlich wirt ein jeder gang in fechtenn getheilt in drey theil welches sonderlich wol zu mercken ist in schwerdt, nemblich angreiffenn nachfolgenn, abzihenn, oder enden als zum erstenn in zugann, geschicht der angruff durch die leger unnd haw wie sie hernach folgen werdenn, in andern theil aber und mitler arbeit wirdt nachgedruckt mit der handtarbeit, und vermischung fuglicher hew. Weiter zum letsten das enden oder abzihenn wie es ordentlich ein jeder am seinem orth hernach fleissig beschribenn unnd gelehrt wurt.
Zum andern sol man mercken auf das vor, und nach, schweche und stercke. Das vor ist so du den man mit deinen stuckenn dohin treibest das er zu seinem furnemen nicht khomen kan, sonder mit versetzenn sich engstenn wie er sich vor deinem stucken schutzen und dieselbenn brechen unnd sperrrenn muge, domit er dir das vor, ablauffe. Das nach ist, wan du also von deinem gegenman ubereilt wurst wie negst oder obenn gemelt, so soltu indes behendt mit fuglicher arbeit, in begegnenn, domit du in steckest in seinenn stuckenn, und also mit deiner arbeit in das vor ab jagest und in also tringest dir zu versetzenn in nach. Also ist ein steter wechsel mit dem vor unnd nach, das es jetzt disser dann jener hat, welcher auch nicht achtung darauff hot, wirdt nimmer nichts gewisses lernen fechten.
