Ein guth stuck auß dem Zürckel
Wan du also wie vor gelert in gleicher arbeit fur dem man sthest, so hab acht wan dir die gelegenheit wirtt, so thrit mit dem lincken fuß zu gleich uff dein linck seitt beseitts auß, und haw zu gleich mit dem tritt ein zürckel zu seim rechten furuber, doch das es in furvberlauffen zur rechten ahn schürft, und zu gleich mit dem zürckel thrit mit deinem rechten fuß zwüschen dir und ihm uff sein recht seitten durch, und in durchtretten haw ein zwirchhaw von deiner rechten gegen seiner lincken vorn zum gesicht indes spring wol auß uff sein rechte, und haw ihm lang nach zu seim kopf.
Mit krumb thrit wol wiltu versetzen
Daß uber schrencken thut ihn letzen
Daß ist wan du krumb mit einen einhauwest, soltu wol mit dem haw tretten auß seim streich, das du dein kopf hinder deiner klingen auß seim streich habest, das ander theil, lernt dich so du mit einem lincken krumbhaw ahn sein schwerdt bindest, das du behend, wo du gelegenheit darzu haben kanst, uberschrenckest, als dhan schnap umb, oder wind die schnellen noch schnap kopf , oder trifstt auß laß uberlauffen.
