Die erste zway anbinden von der linggen seitten mit der schwech vnnd sterck
Item schick dich also mit diesem zufechten von deiner lingken seitten, mit dem langen Spies. Setz deinen linggen fuß furne vnd halt deinen hindern ort in deiner rechten hand wool gericht hinaus auf deiner rechten seitten, dein lingge hand auff deiner linggen seitten in deinem Spies, Jn des trit mit deinem rechten Schenkel hinein vnd stoß Jm nach seinem gesicht, Stoßt er die dann also nach deinem gesicht vnd du mit deinem linggen fuß vorsteest, dein lingge hand bey deinem knie in deinem Spies, dein rechte hand an deinem rechten schenkel deinen ort daran gesetzt, so setz Jm den stoß vornen an deinem Spies ab. Jn des wechsel Jm durch vnd trit mit deinem rechten fuß hinach vnd stoß Jm zu seiner prust, von deiner rechten auf sein rechten seitten. Setzt er dir das ab, so laß deinen Spies vornen auf die erden mit deinem ort sinken. Jn des trit mit deinem rechten schenkel zurügk, dein Spies vor deinem gesicht, mit deiner rechten hand überm haubt. Jn des wend dein rechten hand in dein rechten seitten mit deinem Spies, trit mit dem rechten fuß wider hinein, vnd stoß Jm von deiner rechten auf sein lingge seitten zu seinem gesict, Stoßt er die also zu, so wind Jm das ab an deinem Spies, Jn des trit mit deinem rechten schenkel zurügk, vnd schwing deinen Spies auff, Jn dem trit in die sterck auff dein rechte seitte vnd greiff mit deiner linggen hand widerumb vornen in dein Spies, volg mit deinem rechten fuß hinach, vnd stoß Jm auff sein rechte seitten seines gesichts, versetzt er die das, so setz deinen rechten fuß wider zurügk, Jn des laß deinen Spies vornen bey dem ort auff der erden sinken, vnd wind dich auff in gute versatzung mit deinem Spies über dein haubt, vnd züch dich damit zurügk,
