Ein Gesichtstoß gegen ainen Gemechtstoß
Jtem wann du mit dem zufechten zu dem ainen kombst, So trit mit deinem linggen schenkel hinein, vnd stoß Jm von deiner linggen seitten auf sein rechte zu seinem gesicht, Stoßt er dir also nach deinem gesicht, vnd du mit deinem linggen fuß vorsteest gegen Jm, so setz Jm seinen stoß ab mit deinem vorderen ort, Jn des stoß Jm nach seinem gemechten, Stoßt er dir also nach deinem gemechten, so setz deinen linggen schenkel zurügk, vnd setz Jm den stoß ab vornen an deinem Spies, Jn des trit mit deinem linggen schenkel wider hinein, vnd stich Jm nach seinem Leib, versetzt er dir das, so wind Jm gestracks an seinem Spies auf zu seinem gesicht, Stoßt er dir dann also zwifach zu, so versetz Jm das mitten in deinem Spies, Jn des volg mit deinem rechten schenkel hinnach, vnd stoß Jm auch nach seinem gesicht, Wird er des Stoß gewar, vnd setzt er dir das ab, so wechsel durch, volg mit deinem linggen fuß hinnach, vnd stoß Jm nach seiner rechten seitten, Stoßt er dir also nach deiner rechten seitten, vnd du mit deinem linggen fuß vorsteest, so setz Jm den stoß ab, vornen an deinem Spies auff dein rechten seitten, vnd in dem absetzen trit mit deinem rechten schenkel hinnein, vnd stoß Jm nach seiner prust auf sein rechte seitten, versetzt er dir den stoß, so trit mit deinem rechten fuß wider zurügk, vnd gib dich mit deinem Spies in die sterck, Jn des arbait mit Jm von ainer plöß zu der anderen, vnden vnd oben wo er die wenden mag, Sticht er deine plössen also, So gee mit deinem Spies wol auff über dein haubt, vnd setz Jm das ab, Jn des stoß Jm nach seinem gesicht, vnd zeuch dich damit zurügk in gute versatzung,
