EIn verporgner stich aus dem degen thue sam dw oben ann aim wolt stech[e]n so lug Im den stich vnd far vor Im nider vnd verbent dein handt vnd stich In von vnten auf zu dem gemecht
- Aber ein selich stuck mit dem degen ergreiff Im sein lincken arm nahent bey der handt vnd zuck Im den arm fur dich vnd stich In unter seim vchssen mit deim degen mit stichen vo[n] vnten auff
Aber ein stich von vnten auff In harnisch mit dem degen / wen dw ain ergreifst bey seim arm handt oder degen das hab als fast die weil stich In von vnten auff mit dem degen
- Aber ein hubschait aus dem degen gewappent oder plos mit aim holtzlein nym dein degen In dein handt das die kling vbersich sehe vnd trit zw aim vnd schla[h] Im dein rechten arm auf sein rechten achssel mit dein degen / das Im die kling hinter sein hals auff gee vnd greiff dan mit dein lincken arm kreutzweiss vnder greiff die klingen bey der spitz In die handt vnd zeuch In starck zue dir vnd truck Im sein hals mit den [?] starck zw so erstickstw In In einer huntzkapp[e]n oder [?] er ploss mit dem hals ist
