Mandleich bederben vnd In anderñ henden verderben Haw drein vnd hürt dar ~ Rausch hÿn triff oder la faren Das yn die weisen hassen die man sicht preisen Dar auf dich fasse Alle kunst haben leng vnd masse
das ist der text vnd die glos einer gemainen ler zw kampff
·: Wer ab sinnet
vechtens zw fuess beginnet
Glosa merck das ist ein ler Man mag vechten In harnasch zw fuess vnd zu° ross Dar nach als sich zwen verwilligent vñ auch was das recht aus weist vnd wär es sach das du dich mit eine~ solt slachen oder vechten zw° ross vnd dëucht dich das er dir do mit zw gescheid oder zu° mächtig wer So trit ab zw fuess vnd vicht mit ym aus der hernach geschriben kunst
Das ist der text vnd die glos von zawaien stënden
Der schick sein sper
zwai sten anheben recht wer
Glosa merck das ist wenn dw abgetreten pist vom ross So soltu zw hant des ersten In dem anheben wissen zwen stënt Der erst stant ist wie dw dich mit der glefen schicken solt ze kampf Der ander ist wie du dich solt schicken mit dem swert Auch soltu wissen mit der glefne zwen besunder stänt
