Der erst stant ist vnd gehört zw dem ob er auff dem ross beleibt Der ander stant gehört zw dem ob er auch abtritt gegen den zwaien stenden Soltu die stuck gerecht wissen zw treiben die dir hernach am nagsten verklert warden
Das ist das erst stuck
Merck mit dem ersten stuck schick dich also wenn dw abgetretten pist vom ross vnd er nicht abtreten wil So ste mit dem lincken fuess vor vnd setz dein glefen zw deiner rechten seitten in die erd vñ halt den ort gegen ÿm zw welicher seitten er dir denn zu° reitt Auff die selbig seitten wendt dich albeg gegen Im vnd weiß ym mit deiner glefen die sein ab vnd setz Im do mit an
Aber ein stuck
Wenn dw abgetretñ pist zw ross fuess pleibt er dann auf dem ross So ste mit dem lincken fuess vor vnd halt dein glefen In der mitt mit paiden henden fur dich twerchs Also das der voder ort lenger sey dann der hynder Reitt er dann auff dich mit der glefen So streich vast mit dem voderñ tail deiner glefen zw seiner rechten seitten an die sein vnd setz im do mit an mit einem aus tritt auf sein seitten
Aber ein stuck
